كيف تحسن قابلية شريك حياتك لسماع الكلام باستخدام اساليب التحسين

بتعاني من ان خطيبتك او مراتك مبيسمعوش الكلام؟ !!

يبقى انت راجل خرونج؟! 

ممكن :) بس مش لازم 

النهارده هانتعلم استخدام اسلوب ال lean six sigma  لتحسين قابلية شريك الحياة لسماع الكلام (ربنا يجعل كلامنا خفيف عليهم)

ال LEAN SIX SIGMA  ده اسلوب تحسين من اساليب تحسين الجودة طلع عن طريق موتورولا (السيكس سيجما) وتويوتا (ال LEAN) واستخدمت في تحسين المنتجات والمصانع ومؤخرا في الرعايه الصحية

---------------------------------------------------------------------------------------

الظريف انك ممكن تستخدم الاسلوب ده في تحسين كل حاجه في حياتك , وخلونا نرجع للمثال بتاعنا 

الاسلوب ده بنمشي فيه على طريقه اسمها DMAIC 

Define:

عرف المشكله واتعرف عليها كويس :

هنا لازم تتعرف على ابعاد مشكلتك كويس بمعنى انك بتفكر ايه ابعاد المشكله وبترسم ال (process) او طريقة التواصل معاها عاملة ازاي من بدايتها لنهايتها وبنستخدم اداة مهمه من ادوات الجوده اسمها مخطط الاجراءات (flowchart) 

او بنستخدم اداة اسمها SIPOC 

كل الادوات دي بنستخدمها عشان نشوف العملية بطريقة اوضح وبتوريك نقط الضعف فيها يعني مثلا ترسم مين بيبدأ بالكلام وازاي تكلمها وطريقتك في توجيه الطلبات, وهكذا في خطوات واضحه  

كمان في الخطوة دي بتحدد جملة الهدف (عايز توصل لإيه؟) مثلا : ان كلامك يتسمع ويتنفذ منه 80% خلال اول 3 شهور من المشروع 

وبتحدد كمان الفريق اللي هايشتغل معاك 

انت البلاك بيلت  (قائد الفريق)

الجرين بيلت هايبقوا حماتك ومامتك 

اعضاء الفريق :صاحبك, صاحبتها ,...... الخ 

-------------------------------------------------------------------

Measure:

قيس حجم المشكله (مبتسمعش كلامك بنسبة كام؟)

في المرحلة دي بنستخدم ادوات لتجميع البيانات و تحليلها , بتقعد تعد بقا كام مرة قلت كلام ومتسمعش و تحدد ايه الحدود اللي هاتقبلها بنسميهم USL)UPPER SPECIFICATION LIMIT) و (LOWER SPECIFICATION LIMIT (LSL

مثلا انت اقل حاجه تستحملها هي ان 80 في الميه من كلامك يتسمع واعلى حاجه طبعا 100% وبعدين تقيس بقا انت واصل كام في الميه خلال السنه اللي فاتت مثلا 50% 

في الخطوة دي بنحدد كمان احنا شغالين عند انهي مستوى من السيجما , يعني ايه؟ 

لما توصل لسكس سيجما ده معناه ان نسبة الاخطاء عندك 3.4 في المليون ولما بتقيس بتعرف نسبة الاخطاء في كل مليون فرصه لسماع كلامك اد ايه وبالتالي بتعرف انت في انهي مستوى (1 سيجما , 2 سيجما ,....)

----------------------------------------------------------------

Analyze :

حلل اسباب المشكله واتعرف على السبب الجذري 

في المرحلة دي بتبدأ بعد ما عرفت حجم المشكله تدور على اسبابها بنستخدم ادوات كتير زي مخطط السبب والنتيجه وال |REGRESSION ANALYSIS و ال  HYPOTHESIS TESTING  عشان نوصل للسبب الجذري بطريقة احصائيه  ليه هي مش بتسمع كلامك ؟ مثلا : شخصيتك مش قويه, معتبراك خرونج , شخصيتها قويه, بتسمع كلام اصحابها,.......

REGRESSION ANALYSIS 

--------------------------------------------------------------------------------------------------

Improve:

حط حلول للسبب الجذري عشان تحل المشكله 

لما بتلاقي السبب الجذري سهل تصممله حل ممكن هنا تستخدم ال KAIZEN  اللي هو من اساليب ال LEAN عشان التحسين السريع ,, لو افترضنا ان السبب الجذري ان شخصيتك ضعيفه مثلا يبقى لازم تحط مجموعة حلول منها انك ازاي تقوي شخصيتك وازاي تحسسها بده بصنعة لطافه وازاي تقنعها انها تعمل حاجه بكامل ارادتها وتوجهها للقرار ده 

في الحالة دي لازم تعمل خطة عمل متوضح  فيها مين هايعمل كل حاجه من دول و ازاي وامتى وايه الناتج المتوقع 

و طبعا بتقيس بعد التحسين وتتاكد انك وصلت لهدفك

------------------------------------------------------------------------------

Control:

ازاي تفضل متحكم في التحسين اللي حصل ومتخدش على قفاك تاني 

هنا بقا بتعمل خطة للقياس الدوري عشان تتاكد انك واصل لهدفك طول الوقت واي انحراف بسيط بتعدله فورا 

------------------------------------------------

كده يبقى انت قدرت تحسن قابلية شريك حياتك لسماع الكلام وبقا بيسمع كلامك بنسبة لا تقل عن 80% ....ألف مبروك .

#الجوده_اسلوب_حياة

الجودجي