ادوات الجودة والتحسين المستمر

ده ملخص لوسيلة لتحسين الاداء باستخدام ادوات الجوده بتتكون من ٩ خطوات 
بتتلخص في الحروف FOCUSPDCA 
اول خطوه هي ال find a problem : في الخطوة دي بنحدد ايه المشكله او ايه اللي عايزين نعمله وفي الخطوه دي لاما بيبقى عندنا مشكله واحده في بالنا او عدة مشاكل بنختار بينهم ع حسب اولوياتنا وبعد ما نحددها نبدأ نوصفها بوضوح عشان نحلها 
لو مثلا بنتكلم عن نجار مطلوب منه يعمل اوضة نوم و العميل مش عاجبه الشغل ، بييجي هنا بقا يحدد المشكله بالظبط ايه اللي مش عاجب العميل الخامه التصميم او غيره و يحدده بدقه
الخطوه التانيه هي organize team : تكوين فريق من الناس المسئوله عن العمليه عشان يشتغلوا عليها صاحبنا النجار هايكون فريق اللي هايجيبله خشب واللي هاينصفره واللي هايصمم و اللي هايقطع و غيره ،الفريق ده النجار هايبقى الليدر بتاعه ع الافراد دول و العميل هايبقى ال sponsor وحد من افراد التيم هايبقى مسئول عن تحديد الوقت ومراقبته
الخطوه التالته هي clarify the process : و هنا قائد الفريق او صاحبنا النجار بيبدأ يوضح البروسس هاتمشي ازاي و يستخدم ادواته وزي ما النجار عنده شاكوش ومسامير وفاره ادوات الجوده كمان متعدده وكل واحد منها له استخدام والمهم هنا انك تتعلم تستخدمهم ازاي كويس وبعدين الموضوع سهل الشاكوش ممكن تدق بيه مسمار و ممكن تطلع بيه مسمار من الخشب و ممكن تسلك بيه سنانك المهم تعرف تستخدمه ازاي
في الخطوة دي بنستخدم وسيلة جوده مشهوره هي ال flowchart او المخطط الاجرائي ودي اداه لرسم خطوات البروسس خطوه خطوه لتوضيحها كويس وصاحبنا النجار هنا هايرسم مع الفريق خطوات عمل اوضة النوم خطوه خطوه
نيجي بقا للخطوة الرابعه ودي اهمهم : understand cause of variation : في الخطوة دي بتحدد سبب المشكله الاصلي السبب الجذري ال root cause وهنا بنحددالسبب ده بادوات زي ال fishbone الفريق بيقعد مع بعضه و يبدا يفكر ايه اسباب المشكله و يحطها ع شكل شبه السمكه لتحديد الاسباب والحفر وراها بنسال ليه وليه وليه لحد ما نوصل للسبب الجذري ...صاحبنا النجار وفريقه هنا هايقعدوا يدوروا ع اسباب عدم رضا العميل لحد ما يعرفوا
الخطوه الخامسه هي select : هنا بنختار عاوزين نوصل لايه عشان نرضي العميل و ايه الحل بتاع السبب الجذري اللي عرفناه ، صاحبنا النجار بقا هايستخدم ادواته برضه وادوات الجوده اللي ممكن تستخدم هنا هي ادوات تحديد الاولويات زي ال pareto او ال prioritization matrix (هاتلاقوهم مشروحين ع الصفحه في بوستات منفصله)
الخطوه السادسه هي ال plan وهنا صاحبنا النجار هايحط خطه بالتفصيل مين هايعمل ايه امتى و ازاي و هايقيم كل مهمه في الخطه ازاي
الخطوة السابعه هي ال do : النجار بيبدأ ينفذ الخطه مع فريقه زي ما هي مكتوبه
الخطوة التامنه هي ال check : عمو النجار هنا بيقيس و يفحص هل الشغل الجديد مطابق للي عاوز يوصله واللي يرضي العميل ولا لا وهنا بيستخدم ادوات القياس زي ال control و ال run chart وبرضه هاتلاقوا شرحهم و تفسيرهم في بوست منفصل ع الصفحه هنا و يحدد بقا اذا كان وصل ولا لا
الخطوه التاسعه هي ال act : طبقا للخطوه اللي قبلها لو وصل للي هو عايزه بيقفل شغله و يطبق الطريقه الجديده ع كل الشغل اللي بعد كده ..لو موصلش بيعمل خطه جديده وتستمر الدايره
‫#‏التحسين_عمليه_مستمرة‬
‫#‏الجوده_اسلوب_حياه‬
‫#‏الجودجي‬

ازاي تختار عربيتك

الحيرة الابدية هاشتري ايه؟
موبايل ايفون ولا سامسونج؟
العربيه دي ولا العربيه دي
فيه أداه عظيمه جدا لتحديد الاولويات بتساعدنا على الاختيار هي مصفوفة تحديد الاولويات او ال prioritization matrix 
ازاي بقا نستخدمها ؟
لنفترض انك ادامك 3 عربيات مش عارف تختار منها هانستخدم المصفوفه دي كالتالي :
ع المحور الأفقي هاتحط انت عايز ايه من العربيه (criteria) زي مثلا السعر الاوبشنز استهلاك البنزين واسعار قطع الغيار وهكذا  (في المثال انا اختصرتهم ل 3 بس ممكن تحط اللي انت عايزه ان شاء الله 10 معايير)وتحط لكل منها weight حسب اهميتها بالنسبه لك
و بعدين ع المحور الرأسي حط اختياراتك ... العربيات زي المثال ده او الموبايلات او حتى مجموعة بنات عايز تتجوز واحده منهم :P 

ادي بقا لكل عربيه درجه من 5 لو مطابقه جدا لمتطلباتك او 1 لو مش مطابقه او اي درجه في النص ع حسب اهميتها 
اضرب بقا ال weight في الدرجه اللي اديتها لكل عربيه ... واجمع بالعرض....هايطلعلك رقم ..اعلى رقم هي دي " العربيه " او هو ده اختيارك 
مبروك عليك العربيه :D
#الجودجي
#الجودة_اسلوب_حياه

الكرشوميتير

تجربه شخصيه عن التحليل الجذري للاسباب و الملائمه (appropriateness) و استخدام اسلوب التحسين بتاع ال IHI : "أمك" بي دي اس ايه اه وربنا اسمها كده : 
(AMC PDSA)
الاسلوب ده بيتكون من 3 خطوات قبل دايرة التحسين المشهورة PDSA 
AIM 
MEASURE
CHANGE
في خطوة ال AIM بتحط هدف معين بالنسبه لي كان الهدف اني اصغر كرشي اللي بدأ يكبر
ال MEASURE بتحدد فيها مؤشر INDICATOR تقيس بيه المشكله الحاليه و تتابع تقدمها وبالنسبه للخطوة دي عندي مؤشر مشهور اسمه الكرشوميتير (KERSHOMETER) ومحدش يسالني ايه ده unsure emoticon
في خطوة ال CHANGE بتبدا تحلل المشكله وتدور ع اسباب جذريه و تفكر في حلول والتحليل كان كالاتي :
طلع لي كرش من فترة فبدات احلل المشكله باستخدام الفيش بون و ال 5 whys ولقيت رغم اني بامشي كتير و مش باكل كتير الا انه عمال يزيد ووصلت لسبب اني باشرب بيبسي كتير
فقررت استخدم ال 5 whys وتوصلت للسبب التالي :
بقالي سنه مش بلاقي غير كوبايات بلاستيك صغيرة في السوبر ماركت ودي لما باحط فيها عصير بيخلص بسرعه وبافضل رايح جاي ع التلاجه لحد ما ازهق ...او اجيب الازازة جنبي فالعصير يسخن واحيانا اكسل ارجعه التلاجه فيبات بره ويبوظ
جبت كوبايات ازاز بس كنت باكسل اغسلهم و اسيبهم فس الحوض بالشهور لحد ما يبقاش نافع فيهم غسيل فارميهم
رحت جايب كوبايه ازاز كبيره واحده بس مكنتش باغسلها بين العصير والتاني ..بتتغسل مره كل كام يوم لما طعم الحاجه يتغير
وبطلت فتره عصاير خالص عشان الموضوع ده وبقيت باشرب بيبسي فكرشي كبر
بعد كده بدات احط خطه لحل المشكله
والنهارده اخيرا اخيرا لقيت كوبايات بلاستيك كبيره بعد بحث مضني ..الحمدلله ودي بداية دايرة التحسين المشهوره
PLAN خطط
DO نفذ
STUDY ادرس
ACT تصرف
الخطه هي اني استخدم الكوبايات البلاستيك الكبيرة عشان ارجع للعصير الفريش وابطل بيبسي وفي نفس الوقت اقيس استهلاكي منهم عشان اجيبهم بانتظام واعمل supply chain متخرش الميه عشان اضمن انهم ميخلصوش
التنفيذ بدا النهارده .
الدراسه اني اتابع الكرشوميتير واتاكد اني باتحسن وان الكرش بيقل ... وهنا ال IHI بيتكلموا عن نقطه مهمه اسمها ال balancing measure انك تشوف التحسين اللي عملته ممكن ياثر سلبيا ازاي على البروسس الاصليه وهنا بنتكلم عن الغاء الخطوات الكتير اللي بامشيها في الرحله بين السرير والتلاجه بسبب ان الكوبايه كبرت و حلها اني هازود فترة المشي من ساع لساعه وربع .
خطوة التصرف بقا اني بعد ما اتاكد ان فيه تحسن اني احط خطة control تضمن اني مرجعش للبيبسي تاني
‫#‏الجودة_اسلوب_حياة‬
‫#‏الجودجي‬
‫#‏الكرشوميتير‬

المقال الشارد في ادارة استهلاك الموارد

ادارة استهلاك الموارد او ال utilization management  جزء مهم جدا من علوم الادارة  رغم انه دايما بيتم اغفاله وخصوصا انه بسهولة ممكن يتطبق حتى على الحياة الشخصيه وهايفرق مع اي حد كتير

العلم ده بيركز اساسا على تفادي 3 انماط من استهلاك الموارد
الاستخدام الزائد (over use)
الاستخدام القليل(under use)
الاستخدام غير الصحيح (miss-use)
طيب يعني ايه ؟
افترض ان انت عندك بقرة واحده
لو بتحلبها كل ساعه ده يعتبر استخدام زائد وغالبا البقرة دي هاتموت من الاجهاد
لو بتحلبها كل شهر مره ده يعتبر استخدام قليل واهدار للموارد
لو بتركب البقره دي وتعمل بيها سباقات وخمسات وتفحيط وكده يبقى ده يعتبر استخدام غير صحيح
و في ال3 حالات انت بتعمل اهدار للموارد اللي عندك و مع الوقت هاتفقد الموارد بتاعتك وتفلس وده شامل اي مورد عندك : ذكائك,صحتك,فلوسك,هدومك,طماطمك,خسك,سلاطاتك, بابا غنوجك, .......  :D
----------------------------------------------------------------------------------------------------------
و عشان تقدر توصل للاستخدام السليم للموارد لازم الاول يبقى عندك طريقه تقيس بيها طرق استهلاكك زي المؤشرات مثلا
الراجل اللي فوق اللي بيحلب البقره اكتر من اللازم مش هايعرف انه بيعمل كده الا لو قاس كمية الحليب وحطها على كونترول شارت يوضحله نمط الانتاج اللي غالبا هايقل مع الوقت مع زيادة اجهاد البقرة دي
والراجل التاني اللي سايب البقرة اكل و مرعى وقلة صنعه مش هاياخد باله برضه الا اذا كان بيقيس انتاجها
والاهبل التالت لازم يبقى عارف الوصف الوظيفي للبقره اصلا عشان يعرف يشغلها :P
دي اول خطوة : القياس
تاني خطوة هي اتخاذ الاجراءات المناسبه  بعد القياس
ودي خطوة شبه جدا خطوات التحسين المستمر العادي وبتتضمن في اولها التزام الادارة او الشخص المالك للموارد في انه يستغلها بطريقه صحيحه, و متفتكرش ان دي حاجه سهله ;  اقناع الشخص بتغيير نمط حياته او الطريقه اللي اتعود عليها او هذا ما وجدنا عليه ابائنا صعب جدا ... متتخيلش اد ايه صعب انك تقنع شخص بيفحط بالبقره طول عمره ان مش ده الاستخدام الامثل ليها :\
بعد كده الباقي سهل ... حط خطه وقرر انك تستخدم مواردك صح
1 دور على النت مثلا عن عدد المرات المثاليه لحلب البقره و متوسط الانتاج بتاعها اليومي
2 ابدأ شوف قدرات البقر لا مؤاخذه اللي عندك وهل ده متناسب مع الارقام المثاليه ولا محتاج ترضى بانتاج اقل مع اتخاذ خطوات لتحسين اكلهم وطرق معيشتهم و بعدين تعلي سقف الانتاج بتاعهم
3 ابدأ طبق ده وقيس وحسن باستمرار
-----------------------------------------------------------------------------------------------------------
شيل بقا كلمة "البقره" وحط اي مورد انت عايزه و طبق الخطوات دي لو عايز توصل لاستخدام افضل لمواردك وتحسن نمط معيشتك وانتاجك عموما

#الجودة_اسلوب_حياه
#الجودجي

عايز تفسر ال control chart كويس؟ بص على توزيع الناس في السينما

• 
  

  
  

  \

  الكونترول شارت اداه مهمه جدا للتحكم في العمليات وبنحتاجها كتير عشان نشوف شغلنا ماشي ازاي ... و عشان نفسرها كويس بنسخدم قواعد رخمه اسمها  nelson rules
  و عشان نوضح ال nelson rules 
  تخيلوا لما بنقعد في السينما ... سينما فيها صفوف من الكراسي الصف الاوسط فيهم اللي قدام الشاشه هو ال mean 
  عشان نعرف الناس متوزعين فيها ازاي واذا كانوا متوزعين صح ولا غلط بنعمل ايه؟
  بنبص على الصفوف اللي حوالين الصفوف الوسطانيه (عندنا 3 صفوف على ناحيه و3 صفوف على الناحيه التانيه) وهانعتبر ان اغلب الناس مفروض يبقوا في الصف الوسطاني المتسنتر قدام الشاشه عشان يشوفوا كويس 
  اول حاجه لو لقينا واحد قاعد على الارض بره صفوف الكراسي خالص 
  (astronomical point or one point out of 3 SD )
  ده اكيد عنده مشكله مع الناس كلها ..دي مش مشكلتنا بس ده بيقولنا ان فيه سبب معين هنا (special cause)

  

  
  
• 
  تاني حاجه بنبص على تاني ابعد صف من الناحيتين برضه لو لقينا براه تلاته قاعدين على نفس الناحيه من الصف الوسطاني و اتنين منهم غلى الاقل قاعدين بره تاني ابعد صف حنب بعض دول غالبا حبيبه  مالناش دعوه يا موهيي وده برضه يعتبر special cause
  (Two (or three) out of three points in a row are more than 2 standard deviations from the mean in the same direction)
• 
  
  
  تالت حاجه هانبص على اقرب صف من الصف الوسطاني عندنا هنا 3 حالات : 
  الصف ده عادي يبقى فيه ناس لانه مش بعيد اوي عن الصف المتسنتر قدام الشاشه (mean) 
  اول واحده : لو لقينا على ناحيه واحده 5 بني ادمين و اربعه منهم على الاقل قاعدين بره الصف ده يبقى فيه غالبا مشكله (دول عيال مزوغين من المدرسه مثلا) (Four (or five) out of five points in a row are more than 1 standard deviation from the mean in the same direction.)
• 
  
  
  
  
  
  تاني واحده لو لقيت العيال المزوغه دي منتشره في الصف الاولاني حوالين الصف الوسطاني (mean) بس ع الناحيتين يبقى عشان تقول ان فيه مشكله يبقوا على الاقل عددهم 15 او اكتر ودول زوغوا جماعي وتقريبا ادوا حارس المدرسه رشوه وجم عايزين يشوفوا كويس 
  (Fifteen points in a row are all within 1 standard deviation of the mean on either side of the mean) 
  
  تالت واحده انك تلاقي 8 منهم او اكتر متنطورين حوالين الصف الوسطاني و ولا واحد فيهم قاعد في اول صف حوالين الصف الوسطاني (دول متخانقين على سندوتشات الكبده اللي جابوها وهما بيزوغوا) 
  (Eight points in a row exist with none within 1 standard deviation of the mean and the points are in both directions from the mean.)
  
  -------------------------------------------------------------------
  طيب كده اتكلمنا على 5 قواعد من نيلسون اللي هي القواعد اللي بنبص فيها على الصفوف اللي حوالين الصف الوسطاني 
  فاضل 3 قواعد بنبص فيها على توزيع الناس في السينما :
• 
  اول واحده بتبص على كام واحد قاعدين ورا بعض في نفس الناحيه من الصف الوسطاني بغض النظر عن توزيعهم في الصفوف المحيطه (SD) لو لقيتهم 6 او اكتر ده بيسموه shift وغالبا البت اللي بتقطع التذاكر بتاخد رشاوي يا معلم 
  (6 (or more) points in a row are on the same side of the mean.)
  تاني واحد بتشوف توزيع الناس حوالين الصف الوسطاني لو لقيت 14 او اكتر واحد يمين وواحد شمال واحد يمين وواحد شمال ده بنسميه (pattern) دول غالبا هايفجروا السينما 
  (Fourteen (or more) points in a row alternate in direction, increasing then decreasing)
  اخر حاجه لو لقيت سته قاعدين بحيث انهم مع ورا بعض معديين الخط الوسطاني من اليمين للشمال اول العكس ده اسمه (trend) ودول غالبا شلة بنات 
  (Six (or more) points in a row are continually increasing (or decreasing))
  
  ____________________________________
  يبقى الملخص عشان تحدد اي كونترول شارت تحت السيطره ولا لا بتبص على 8 قواعد 
  5 قواعد منهم بتبص على توزيع النقط في ال 3 ستاندارد ديفياشن وكام نقطه بره كل واحد منهم 
  و 3 قواعد منهم بتبص على توزيع النقط حوالين الخط الوسطاني (mean) بغض النظر عن الستاندرد ديفياشن 
• --------------------------------------------------------------------------------------------------------------------
  مشاهده ممتعه للفيلم و ابقى خد علبة الفشار الفاضيه معاك وانت خارج وخليك مؤدب
  #الجودة_اسلوب_حياة
  #الجودجي
• 
  

احمي بيتك باستخدام (تحليل التعرض للاخطار (HVA hazard vulnerability analysis) )

بدل ما احنا قاعدين في البيت فاضيين مش لاقيين حاجه نعملها ممكن نقعد نتوقع المصايب اللي ممكن تحصلنا وازاي نواجهها و أهو وقوع البلا ولا انتظاره 
الناس بتوع ادارة المخاطر بياخدوا فلوس ققد كده على قلبهم عشان يعملوا نفس الشغلانه وبيستخدموا فيها أداه اسمها :HVA 
الاداه دي من اهم و اقوى ادوات تحليل المخاطر وطريقة عملها ممتعه جدا
لو احنا هانحلل المخاطر اللي بيتعرض لها بيتنا الموقر كالعادة اول خطوة بنكون فريق اللي هو طبعا انت والمدام والعيال
و بنبدأ نستخدم الاداه (HVA hazard vulnerability analysis)  ازااي؟
اقولك ...
الغرض هو توقع الاخطار اللي ممكن تحصل ودي بيقسموها لاربع مناطق رئيسيه طبقا :Kaiser Permanente HVA:

1. احداث بشريه (حوادث خطف، حوادث سيارات ،قنابل (و دي فيه منها كتير اليومين دول ).......)
2. كوارث طبيعيه (زلازل،براكين، فيضانات،زيارة من حماتك )
3. اخطار تكنولوجيه (النور يقطع، جهاز يبوظ ،....)
4. 
   
5. احداث لها علاقه بالمواد الخطرة (الواد شرب بوتاس، زيت سخن اتدلق على المدام )
   

- -------------------------------------------------- 

بنقعد بقا مع بعض و خطوة بخطوة

الاول بتشرح للفريق الكلام اللي فوق ده واهمية اننا نتوقع الاخطار قبل ما تحصل وليه ده مهم

وبعدين نبدأ نحدد الاخطار اللي بتندرج تحت كل عنوان من الاربع عناوين اللي فوق (زي ما انا عامل بين الاقواس كده) و نحط الاخطار دي في شييت اكسيل على اول عمود من الشمال

بعدها بنتوقع لكل خطر من دول احتمالية حدوثه (probability )على معيار من ١ الى ٣  حيث ١ هي احتمال حدوثه قليل و ٣ احتمال حدوثه كبير 

طيب بعد الاحتماليه هانحسب شدة الضرر الناتج من كل حدث (severity )  في٦ خطوات :

• تأثير الحدث ده على البني ادمين (اللي هما احنا) وهنا اعلى خطوره بنديها ٣  واقل خطورة بنديها ١ 
• تاثير الحدث ده على الممتلكات وهنا اعلى خطوره بنديها ٣  واقل خطورة بنديها ١ 
• تاثير الحدث ده على سير العمل في البيت (يعني قدرته على تعطيل سير الحياه الطبيعيه في البيت) وهنا اعلى خطوره بنديها ٣  واقل خطورة بنديها ١ 
• الاستعداد للحدث : كل ما نبقى مستعدين للحدث ده او حصل قبل كده فاحنا استعدينا ليه بندي سكور اقل ١ مثلا ولو مش مستعدين ليه او بنتفاجئ بيه بياخد سكور اعلى لحد ٣ 
• الاستجابه الداخليه : بنقيم فيها قدرة المؤسسه/البيت  داخليا على التعامل مع الحدث .. يعني مثلا لو الخطر هو انقطاع الميه هل عندك ازايز في البيت مليانه احتياطي ؟ ولا هاتعطش لحد ما تموت .... كل ما تكون مستعد بتدي سكور اقل ولو مش مستعد بتدي سكور اعلى 
• الاستجابه الخارجيه: ودي بتقيم وضعك بين جيرانك لا مؤاخذه ..علاقتكم كويسه وممكن يسلفك ازازتين ميه ولا هايشمت فيك ويدلق الميه قدام عينك وانت عطشان زي الكفار؟ كل ما تكون مظبط وضعك مع جيرانك بتاخد سكور اقل والعكس بالعكس لو مش هايساعدوك تاخد سكور اعلى 

بعد كده بتبدأ تستخدم الاكسيل الشييت اللي ممكن تنزله ببلاش من هنا 

cchealth.org/ems/pdf/Kaiser-HVA-Tool-and-Instructions.xls

 الشيت ده بيحسبلك احتمالية حدوث كل نوع من انواع الاخطار الاربع وكمان خطورة كل حدث

RISK=PROBABILITY * SEVERITY 

الاحتماليه بيحسبها بانه بيقسم كل سكور لاحتمال انت حطيته (1 او 2 او 3) على اعلى احتماليه اللي هي 3 يعني طبقا للصورة لو بصيت على الصف بتاع التلفزيون لما يبوظ ..الاحتماليه = 2/3 يعني تقريبا 0.66
لو بصيت على صف النور بيقطع هاتلاقي احتماليته 100% يعني بيتكرر كتير اوي وان العربيه بطاريتها تنام احتماليته 0.33  وهكذا 

و شدة الخطر (severity) نفس الطريقه بس المره دي احنا عندنا 6 انواع لشدة الخطر وبالتالي بنجيب ال average  بتاعهم
بص لنفس الصف بتاع التلفزيون لما يبوظ هايجمع ال  severity  بتاعت ال6 اللي هما من اليمين للشمال  (1+1+3+3+2+2+1) = 12 و يقسمهم على 18 ...ليه على 18؟ لان كل واحد فيهم اعلى سكور ليه 3 وهما 6 انواع هاتطلع النتيجه
لما احسب الخطوره بقا هاضرب الاحتماليه في شدة الخطر
يعني لاول صف قلنا الاحتماليه 0.66 وحسبنا شدة الخطوره  طلعت برضه 0.66 هانضربهم في بعض هاتطلع 0.44 يعني 44% زي ما باين في خانة الريسك اللي لونها اصفر 

كمان بنحسب الريسك الكلي لكل الاحداث اللي بتدخل في الاخطار التكنولوجيه زي ما هو باين في الشيت 39%
الحته دي رخمه شوية في حساباتها بس الخبر الحلو انك مش محتاج تعرف التفاصيل دي لان الشييت بيحسبها لوحده المهم بس تقعد مع الفريق وتحددوا احتمال وشدة خطورة كل خطر 

--------------------------------------------------------------------------------------------

و بعدين؟ 

بيطلعلنا الريسك بتاع كل نوع من الانواع الاربعه وعلى أساس كده بنبدأ نحط الخطط بتاعتنا على اساس الاولويات بحيث اننا نتجنب الاخطار دي لما تحصل
انت بتعمل كل ده قبل المشاكل ما تحصل اصلا ...لو في ايدك تمنعها زي مثلا البطاريه نامت ممكن تفحص البطاريه على فترات منتظمه ... ولو مش في ايدك تمنعها زي النور اللي بيقطع يبقى عندك وسيله لاتقاء الضرر منها من اول ال UPS لحد المولد او ع الاقل الكشافات

ماس كهربا بيؤدي لحريق يبقى نختبر التوصيلات على فترات منتظمه ونجيب طفايات حريق 

#الجودجي

#الجودة_أسلوب_حياه 

الرسوم البيانيه ازاي تختارها وتستخدمها ...في المطبخ

عوده لمنشورات لكي يا سيدتي :D
استخدام الرسوم البيانيه في المطبخ
تخيل أد ايه الوفر في الوقت والمجهود اللي ممكن يحصل لو ست البيت او الراجل اللي بيدخل المطبخ (استغفر الله العظيم) استخدموا الرسوم البيانيه .... ازاي هايحصل وفر؟
تعالى اقولك
---------------------------------------------------------------------
مثلا حضرتك عايز تعرف اداء المدام مع الوقت بيتحسن ولا لأ ... جودة الاكل وطعمه , استهلاك المواد الغذائيه و بالتالي مصروف البيت أو حتى درجة سخونة الاكل وقت تقديمه
مادام جبت سيرة "الوقت" يبقى انت بتتكلم عن مراقبة الاداء باستخدام رسوم بيانيه زي ال line graph  او run chart

 النوع ده من الرسوم البيانيه بيديك فكره عن اداء المدام مقارنة بالزمن ممكن تسجل بيانات عن طعم الاكل على مقياس من 1 ل 100 مثلا اول يوم جواز كان طعم الاكل 12 تاني يوم بقا 15 بعد شهرين هي خدت دورة عند حماتها مثلا لقيت الطعم بقا 55 واتحسن مع الوقت ل 70 ....وهكذا

او ممكن تستخدم الانقح بقا وهو ال control chart  وده بيبقى له حد اعلى وحد ادنى و على نفس المثال : الحد الاعلى 99  والادنى (بعد ما ثبت رجلك في البيت كده وصوتك علي ممكن تخليه 50 انت وحمشنتك على فكره) وفي الحاله دي ال control chart  هايوريك ادائها على المدى الزمني ويوريك كمان لو فيه تغيرات حاده في الاداء (اتخانقتوا مثلا فهاتلاقي مقياس الطعم نزل ل 20 ..او خرجتها خروجه حلوة امبارح فالمزاج اتحسن والمقياس بقا 100)

------------------------------------------------------------------------------------------
تاني فئة من الرسوم البيانيه هي فئة المقارنه (ربنا يستر)
عندنا هنا كذا نوع اسهلهم هو ال bar chart
ببساطه ممكن ست البيت تستخدمه في مقارنة استهلاك افراد الاسره لاكلات معينه ... تحط الاكلات على المحور الافقي (محشي صينية بطاطس, تونه, مسقعه, كشري,....) و على المحور الراسي معدل استهلاك كل اكله وبالشكل ده تقدر تعرف ايه اكتر اكله مفضله للاسره

النوع التاني اللي ممكن نستخدمه هو ال pie chart  وده بنستخدمه لمقارنة حاجات من population واحده مجموعها 100%... مثلا نسب المواد الداخله في عمل صينية البطاطس (بطاطس 30% طماطم 20 % ... وهكذا حتى 100%)

-------------------------------------------------------------------------------------------------------------

الفئة التالته هي ايجاد العلاقات
مثلا هل فيه علاقه بين زيادة المصاريف و فرجتها على الشيف الشربيني ؟
احسب كل مره هي بتشوف الشيف الشربيني بتصرف كام في اليوم ده على الطبخ ...جمع الداتا لفتره معينه وحطهم على الscatter diagram
 و شوف النتيجه : حاجه من 3
لاما هايطلع خط مستقيم طالع لفوق تبقى علاقه ايجابيه يا معلم ولازم تحذف قناة cbc  سفرة
لاما هايطلع خط مستقيم نازل لتحت ودي نتيجه عكسيه كل ما تتفرج عليه تقل المصاريف ... احذف كل القنوات ماعدا cbc سفره
لاما هايطلعلك نقط مالهاش معنى يبقى مفيش علاقه

----------------------------------------------------------------------------------------------------

الفئة الرابعه هي تحديد الاولويات 

هنا فيه كذا حاجه اشهرها الباريتو وده ممكن ترجع فيه للمقال السابق عشان تعرف بيستخدم ازاي بس يستخدم في ايه في المطبخ؟

في حل السؤال التاريخي : هاناكل ايه النهارده؟ 

ست البيت هاتحط انواع الاكل و تحسب عدد مرات تكرارهم وتقيس معدل الرضا كل مره و بعدين تعمل باريتو وتكتشف ال vital few  دي هم اكلات ممكن تعيدها من غير ما تسال جوزها 

---------------------------------------------------------------------

دول أشهر رسوم بيانيه ممكن تستخدمها بسهولة لقياس اداء اي حاجه على حسب التصنيف ده وبتختار اللي يناسبك طبقا لنفس التصنيف 

المهم تعرف و تحدد انت عايز تقيس ايه .

#بالهنا_والشفا 

#الجودة_اسلوب_حياة

# الجودجي

الحاج باريتو و منتخب مصر

زمااان كان فيه راجل منفسن ايطالي اسمه باريتو ...الراجل ده قعد يحسب ثروات سكان ايطاليا واكتشف ان 20% من سكان ايطاليا عندهم 80% من ثروة ايطاليا كلها
بعدها الناس اكتشفت اني دي قاعده عامه ...20% تقريبا من اسباب اي مشكله بيسببوا 80% من المشكله .. 20% من الموظفين بيعملوا 80% من الشغل ...20% من الستات كافيين جدا انهم يبوظوا مزاج 80% من الرجاله  و هكذا
من هنا طلعت قاعدة 20_80 او قاعدة باريتو اللي بنستخدمها في تحديد الاولويات او ال vital few عشان نسهل ع نفسنا
مخطط باريتو اسلوب ظريف عشان تحدد اولوياتك صعوبته في انه اسلوب احصائي عايز شوية تعب ..بيتعمل ازاي؟
طيب خلينا نشرحها بمثل ... منتخب مصر بيتغلب مثلا
1 حددي اسباب المشكله بعد ما تستخدمي اسلوب زي ال fishbone ... يعني مثلا الاسباب : المدرب حاطط تشكيل وحش ، اللعيبه مش بتباصي الكورة ، مفيش مهاجم ، خط الوسط وحش ،حارس المرمى تعبان،اللعيبه سهرانه ،...
2 بنحسب عدد مرات تكرار اسباب المشكله (frequency ) .. يعني ايه؟ يعني بنشوف كل مرة المشكلة حصلت فيها كان ايه السبب او الاسباب اللي ادت لكده ونعد بقا كل سبب ادى كام مره لحدوث المشكله ..كام مرة اتغلبنا عشان المدرب حط تشكيل اي كلام وكام مره اتغلبنا عشان مفيش مهاجم وهكذا
3 نرتب الاسباب تنازليا من الاعلى تكرارا للاقل تكرار ونحطهم في جدول في اول عمود الاسباب (التشكيل وحش ..اللعيبه مش بتباصي ..مفيش مهاجم) ونحط في العمود التاني التكرار بتاع كل سبب ونجمعهم على بعض هايدينا اجمالي تكرار الاسباب
4 نقسم عدد تكرار كل سبب على اجمالي تكرار الاسباب ... مثلا التشكيل وحش اتكرر 5 مرات في حين ان لما جمعنا كل تكرارات الاسباب طلع خمسين يبقى نسبة حدوث المشكله(هزيمة المنتخب) بسبب التشكيل الوحش 10% (5 على 50%) ونحط النسب دي قدام الاسباب في العمود التالت في الجدول كل سبب قدامه نسبته اللي هي حاصل قسمة عدد مرات تكرار السبب على اجمالي تكرار الاسباب ..كل سبب ادامه نسبته
5 الخطوة الرخمه بقا حاجه اسمها ال accumalitive percentage بنحطها في العمود الرابع : دلوقت نسبة حدوث المشكله بسبب التشكيل الوحش 10% يبقى نحط 10% في العمود الرابع ..طيب السبب اللي بعده في التكرار (افتكروا اننا مرتبين تنازلي لان دي خطوة مهمه) مثلا مفيش مهاجم وده نسبته لنفترض 5% نحط ادامه كام في العامود الرابع؟ نحط مجموع السببين دول اللي هو 15% ...تهتوا؟ بالراحه كده ترجمتها اسمها النسبه المجمعه يعني احنا بنحط فيها مجموع النسب.. السبب الاول والتاني اتسببوا في حدوث المشكله بنسبه 15 % (السبب الاول 10%والتاني 5%) ولنا نيجي لخانة التالت اللي هو نسبته مثلا 4% يبقى بتحط قدامه في العامود الرابع 19% (نسبة مساهمة ال3 اسباب الاولى في حدوث المشكله هي 10+5+4=19)
بعد كده بقا عندك جدول اول عامود فيه اسباب المشكله
تاني عامود التكرار (كام مره السبب ده ادى لحدوث المشكله)
تالت عامود النسبه المئويه(ما هي نسبة مشاركة السبب ده في حدوث المشكله)
رابع عامود cummalative percentage
نيجي للرسم بقا بنرسم رسم بياني له محورين راسيين بنحط ع الشمال التكرار و ع اليمين النسبه المجمعه
المحور الافقي عليه الاسباب
طيب اول حاجه بنطلع من كل سبب عامود bar chart يقف عند رقم التكرار بتاعه على المحور الراسي الايسر
وبعدين نبص ع المحور التاني اليمين ونحط نقطه قصاد كل سبب قدام الرقم بتاعه في النسبه المجمعه
كده عندنا شكل بالعواميد يقطعه خط نقط
اخر خطوة :
نيجي بقا على المحور الراسي اليمين ونرسم خط بالعرض يبدا من رقم 80 (المحور ده متقسم من 0 ل 100 ) طب ليه 80؟ لان حضرتك قاعدة باريتو بتقول ان 20 % من الاسباب تسبب 80% من المشكله عشان كده اخترنا رقم 80 على محور النسبه المجمعه لان ده معناه ان اللي هايطلع ده بيسبب 80 في الميه من المشكله واول ما الخط ده يقطع الخط اللي رسمناه بالنقط ننزل منه خط راسي يقسملنا الشكل البياني ... ما هو على يسار الخط الراسي ده هو الاسباب المهمه vital few
و ما على يمينه هو اللي مالوش لازمه
خد بقا ال vital few واشتغل عليهم يمكن المنتخب ميتغلبش 
حد فهم حاجه؟
#الجودة_اسلوب_حياة
#الجودجي

قيادة السيارات : انت مدير مخاطر كل يوم

علم ادارة المخاطر عموما علم بيهتم بالتعرف على المخاطر في بيئة العمل و تحديدها و التعامل معاها قبل ما تحصل وتقليل اضرارها لو حصلت

و على أد ما بيبان انه علم صعب الا ان كل واحد فينا بيستخدم مبادئ العلم ده كل يوم واقرب مثال لكده هو سواقة العربيه

--------------------------------------------------------------------------

حضرتك كل يوم وانت بتسوق سواء رايح شغلك او رايح تتفسح او مسافر بتكون مدير مخاطر في عربيتك , ازاي؟ اقولكم:

خطوات ادارة المخاطر بتتلخص في 3 خطوات رئيسيه: 

1. التعرف على المخاطر Risk Identification
2. تقييم المخاطر Risk Assessment
3. التعامل مع المخاطر  Risk Handling 

----------------------------------------------------------------------------------

وانت بتسوق عربيتك طول الوقت بتعمل خطوة التعرف على المخاطر:

 بتبص على بيانات و مؤشرات و تحللها  عشان تعرف ايه المخاطر اللي ممكن تحصل , بتبص على سرعتك وعلى درجة حرارة الموتور و ضغط الزيت وكمان بتبص على الطريق حواليك وتحدد المخاطر للي حواليك ( واحده ست سايقه وده خطر في حد ذاته من غير ما هي تعمل اي حاجه  :D , واحد سايق بسرعه كبيره , عربيه قريبه منك, عربيه بتكسر عليك , اشارة مرور بتقرب منك , رادار على الطريق ,...... وهكذا)

---------------------------------------------------------------------------------

طبقا للمخاطر اللي بتحددها بتعمل الخطوة التانيه وهي تقييم المخاطر دي وتحديد درجة خطورتها واولويات التعامل معاها :

بمعنى تاني بتحدد ايه الاخطر واللي محتاج تعامل فوري وايه اللي اقل خطورة وممكن تاجل التعامل معاه

مثلا واحده ست سايقه قدامك دي ممكن تفرمل في اي لحظه وممكن تطق في دماغها تبص في مراية العربيه عشان تظبط مكياجها او تلف وهي سايقه وترضع العيل من الببرونه وبالتالي هي خطر له اولويه قصوى للتعامل معاه وهانعرف ازاي في الخطوة التالته

مثال تاني انك شايف اشارة مرور مفتوحه بس قربت تقفل عليك هنا بتحدد درجة الخطورة وهل التعامل هايبقى بانك تدعس بنزين وتعدي وتعرض نفسك لخطر المخالفه اللي بيوصل للحبس في بعض البلدان ولا تهدي وتخليك في الامان

------------------------------------------------------------------------------

نيجي بقا للخطوة التالته التعامل مع المخاطر 

في الخطوة دي عندك حالتين : 

خطر حدث بالفعل :

و هنا بتحاول تقلل من اضراره قدر الامكان 

خطر لم يحدث بعد بس انت حددته وقيمته طبقا للخطوات اللي فاتت

و ده عندك عدة طرق للتعامل معاه :

• تفادي الخطر risk avoidance : و هنا رجوعا لمثل الست اللي سايقه قدامك بتتفاداه باستخدام اقدم قاعده بنتعلمها في السواقه ماتسوقش ورا واحده ست ابدااااا وتحت اي ظروف :D
• تحويل الخطر: risk shifting  ده زي مايكون عندك تامين ضد الحوادث انت كده بتحول تكلفة الخطر على حد تاني لو حصل لا قدر الله شركة التامين اللي بتدفع 
• منع الخطر :risk prevention : و ده بأنك  تعمل وسائل استباقيه زي failure mode and effect analysis FMEA  اللي اتكلمنا عليها قبل كده بحيث انك تتوقع ايه اللي ممكن يحصل وتمنعه قبل حدوثه مثلا تغير زيت و تطمن ع السوايل وتظبط الاطارات قبل ما  تسافر 

----------------------------------------------------

#الجودة_أسلوب حياة

الجودجي

البيت السعيد بدون waste, الجزء الأول : جزاء تبويظ ال 5S هو "التنخيع"

في التسعينات تويوتا طورت علم اسمه علم ال LEAN  وده الغرض منه القضاء على الفاقد (WASTE)بالانجليزي او المودا (MUDA) بالياباني ولقوا ان :
اي حاجه بتتعمل في الدنيا جواها 3 انواع من الخطوات :

1. خطوات مفيده (VALUE ADDING):  ودي الخطوات اللي بتفيد العميل بتاعك فعلا ولا يمكن الاستغناء عنها ... مثلا الست اللي بتطبخ خطوات اعداد الاكل من طبخ وتقديم وخلافه هي خطوات اساسيه وبتضيف قيمه بتوصل للعميل اللي هو البيه اللي قاعد على الكنبه
2. خطوات عرضيه INCIDENTAL WORK:مش بتقدم فايده مباشرة للعميل بس لابد منها لتقديم الخدمه وعلى نفس المثال الخطوات اللي زي تغيير الانبوبه وشراء الخضار و تنضيف الاطباق و تنضيف البوتجاز هي خطوات لا يهتم بها العميل (البيه اللي قاعد على الكنبه) بس ضروريه لتقديم الخدمة له
3. خطوات ملهاش لازمه (WASTE): ودي خطوات عباره عن تضييع وقت لا هي ضرورية ولا هي بتقدم فايده للعميل(البيه اللي قاعد على الكنبه) زي مثلا خطوات ان الزوجه تغسل وشها او تتحرك عشان تجيب حاجات من النيش هي مش حاطاها جنبها او تهرش في شعرها وهكذا 

وعليه عشان حضرتك توصل لاحسن نتايج محتاج تقضي على المودا او الفاقد وفي نفس الوقت تقلل الخطوات العرضيه وتخلي الاجراءات كلها LEAN  يعني "مشفيه" زي اللحمه المتشفيه من الدهن والعضم نخلي اجرائتنا خاليه تماما من الفاقد

 الفاقد او ال WASTE اتصنف  تحت 8 انواع

 ----------------------------------------------------------------------------------------------------
 النهارده هانبدأ نتكلم  على ال 8 انواع دول وازاي ممكن نستفيد بيهم في البيت

أولهم هو ال transportation : التنقل :

 اي زوج بيحترم نفسه هاتلاقيه بعد ما يرجع من الشغل مطلوب منه يتنقل كتير في الشقة وبرا الشقة, وما يتبعه ده من تنقل للموارد في البيت في حين  ان ده فاقد مهم جدا ممكن يتغلب عليه بعدة طرق :

1. يتصل بالمدام قبل ما يرجع عشان لو عايزة حاجه يجيبها وهو جاي ويحط سياسه انه وربنا وربنا ما هو نازل تاني بعد ما يروح حتى لو البيت ولع
2. قبل ما يستقر على كنبته الحبيبه يجيب كل حاجته حواليه موبايله , لاب توبه, ريموته ,بيبسيه, شيبسيه, كوباياته ,طفايته وسجايره وولاعته وايد البلاي ستيشن الوايرلس وبعدها مفيش اي داعي انه يقوم والغدا ييجي لحد الكنبه على ترابيزة الصالون 
3. التسوق : مش لازم تلف المول معاها ... اشتري اون لاين
4. تنقلات المدام مهمة جدا وغالبا مفيهاش فاقد فخليها تتحرك براحتها وده ينطبق بشدة على تحركات الزوج الضروريه عشان ميطلعلوش كرش ومنها النزول للعب الكورة مع اصحابه 

التاني هو ال inventory: التخزين:

هنا بقا فيه افكار بالهبل متاخده من اساليب الlean  :اهمهم ال 5S

1.  5S : و ده اسلوب بيستخدم لترتيب بيئة العمل واماكن التخزين لتقليل الوقت والفاقد بيتكون من خمس خطوات بتبدأ بحرف الS :

1. • Seiri 整理
   • Seiton 整頓
   • Seiso 清掃
   •  Seiketsu 清潔
   •   Shitsuke 躾
   طبعا انتوا عارفين ياباني كويس ومش محتاجين ترجمه :D
2.  المهم الفكرة كلها اننا بنصنف كل حاجه بنستخدمها على اساس تكرار استخدامنا ليها وبنرتبها حوالينا طبقا للتصنيف ده ...يعني ايه؟ 
3. يعني مثلا المدام بتستخدم السكينه في المطبخ طول الوقت يبقى لازم تتحط اقرب حاجه ليها مش في الدرج اللي تحت مثلا لان ده هايعتبر فاقد كبير انها تجيبها كل شويه وتوطي في كل مره عشان تستعملها في حين انها مثلا ممكن تشوف الحاجات اللي بتستخدمها كل ساعه مثلا وتخزنها في درج المطبخ الاولاني واللي كل ساعتين في الدرج التاني واللي مره ولا مرتين في اليوم في الدرج الاخير واللي مره في الاسبوع في ضرفة الدولاب واللي مره في الشهر في اوضة الخزين مالوش لازمه يزحم المطبخ 
4. طب بعد ما يطلع عينها وتعمل كل ده : تصنف كل ادوات المطبخ والتخزين لاستعمال دائم ويومي واسبوعي و شهري في جداول و تعيد ترتيب المطبخ كله ..هاتسمح للبيه انه ييجي يلخبطلها كل ده عشان مناولتوش كوباية ميه واضطر يجيبها لنفسه فلخبط الدنيا؟ اكيد لأ بس عشان تضمن الاستمراريه محتاجه تعمل ستيكرز ومساعدات بصريه بمكان كل حاجه , استيكر على كل درج وكل ضلفه بمحتوياتهم عشان كل حاجه ترجع مكانها وتحدد حتى على الرخامه مكان كل حاجه بشريط بلاستر عليه اسم الحاجه دي ,,, في الحاله دي ومادام كل حاجه واضح ومعروف مكانها فين يحق لها تماما انها تغز البيه بسكينه رفيعه في الفقره العنقيه السابعه لما يلخبط الدنيا  (و هو ما يسمى "بالتنخيع" وبيخلي البني ادم بيتنفس بس بيفقد اي تحكم عضلي في اي عضله من الرقبه ونازل , جربته انا شخصيا قبل كده في ضفدعه وكان هايل جدا)  
5. -------
6. طب ايه الفايده من ده كله , اقولكم:
7.  الفايده الاولى ان ده هايخلي ست البيت عندها قوايم تعرفها بسهولة مخزونها عامل ازاي وبالتالي مش هاتفقد حاجات لانها باظت ومش هاتشتري زيادة لانها عارفه بالظبط احتياجاتها 
8. الفايده التانيه توفير الوقت (و ده نوع الفقد الرابع من ال8 انواع) لان كل حاجه معروف مكانها بالظبط فين ، فمش هاندور 
9. الفايده التالته سهولة التنضيف والترتيب
10. ---------------------------------------------------------------------------------------
11. كده خلصنا نوعين من ال WASTE  اتعرفنا عليهم وعلى طرق عمليه للقضاء عليهم , المره الجايه هانكمل عشان تقريبا انا هاتغز دلوقت 
12. # مين مرجعش الكوبايه مكانها 
13. #الشقه فيها عفاريت

#الجودة_اسلوب_حياه

الجودجي

عائلة الاستاذ برعي .... بين المؤشرات والتخطيط الاستراتيجي

طيب وعدتكم اننا هانتكلم عن المؤشرات واستاذنا دكتور جمال مصطفى فكرني
تخيل انك نزلت في يوم عادي تسوق عربيتك ولقيت ان كل العدادات قدامك مش شغاله!!!!!!!
 لا انت عارف سرعتك كام؟
 ولا معاك بنزين اد ايه؟
ولا ضغط الزيت في المحرك عامل ازاي ولا درجة حرارته ؟
تفتكر قدامك اد ايه قبل ما تعمل حادثه او العربيه تولع بيك؟ خصوصا لو انت سبت المشكله دي ومحليتهاش ؟
و تخيل اننا رغم استنكارنا لمثال العربيه ده بنعمل كده كل يوم بنسوق حياتنا وشغلنا ومستشفايتنا بنفس الطريقه
من غير رؤية واضحه ولا هدف محدد و لو فيه هدف محدد معندناش  مؤشرات تقولنا احنا ماشيين في الطريق الصح ولا رايحين نلبس في الحيط
-----------------------------------------------------------------------
تعالوا نجيب قصة المؤشرات من أولها:
في علم الإدارة عندنا مستويات مختلفه من التخطيط :

تخطيط استراتيجي: و ده المسئول عنه الادارة العليا (الحكومه , في رواية اخرى:  المدام ,, اه المدام متحورش وتعمل نفسك مسيطر :D ) النوع ده من التخطيط مش المفروض يتطرق لتفاصيل لانه معني بالخطوط العريضه وبيبني الخطه بناءا على توجهات وخطوات معينه  :

 (مستوى الادارة العليا بيختلف من مكان لمكان بس عموما مينفعش حد يقول ان قسم الباطنه مثلا هايعمل خطه استراتيجيه ,, ده تحشيش لامؤاخذه)

• الرؤيه : عايزين نبقى ايه في المستقبل؟ بنحلم نكون ايه ؟ (مثلا ان اسرتنا خلال خمس سنين تبقى عايشه في فيلا بحمام سباحه في كمبوند فشيخ)
• الرسالة : احنا مين وبنعمل ايه وموجودين هنا ليه وبنخدم مين (على نفس المثال : اسرة الاخ برعي بتلتزم بتقديم جميع الخدمات الاسريه فل بورد لافراها من اقامة ورعايه وتعليم وترفيه طبقا لاحدث السبل وخلال ميزانيه محدده)
• تحليل نقاط القوة والضعف ( SWOT analysis)  : 

  

  SWOT analysis 

التحليل ده من أقوى ادوات التخطيط الاستراتيجي وبنفكر واحنا بنعمله في مؤثرات داخليه من جو الاسرة في المثال بتاعنا اللي هي نقاط القوة والضعف , و مؤثرات خارجيه بره نطاق الاسره زي المهددات والفرص , يعني ايه؟ 

مثلا : نقاط القوة : ان اسرة الاستاذ برعي اسرة متماسكه , افرادها بيعملوا وبيتعلموا في اماكن مروقه مع مستقبل وظيفي واضح,.....

نقاط الضعف : الاستاذ برعي بيدخن , السيده برعي مبتسمعش كلامه (راجع المدونه لحل هذة المشكله :) ) , .....

دي كلها نقط متعلقه بالاسره نفسها 

نيجي بقا للمهددات والفرص 

المهددات : مدير أستاذ برعي دمه تقيل ومش بيطيقه, زميل أستاذ برعي بيذاكر لشهاده اعلى وممكن يترقى قبله 

الفرص : مدام برعي عندها فرصة ترقي في مكان شغل ووظيفه اعلى , استاذ برعي عنده فرصه ياخد منحة دكتوراه 

• الاهداف والاستراتيجيات  :  في الخطوة دي بنحط اهداف واضحه لتنفيذ الرساله ومحتولة الوصول للرؤيه الاهداف لازم تبقى SMART محدده,قابله للقياس , قابله للتحقيق, منطقيه, ولها مدى زمني مثلا : زيادة دخل الاسرة الشهري بنسبة 30% خلال السنه 2015/2016
• تجهيز خطة العمل : طبقا للاهداف اللي عندنا بنبدأ نعمل خطة عمل لتنفيذها وده مستوى تاني من التخطيط 

---------------------------------------------------------------------------------------

تخطيط تنفيذي : وده مسئول عنه الافراد اللي هاينفذوا المهام اللي اتحددت في الخطه الاستراتيجيه :

هنا الافراد بياخدوا لاهداف اللي في الخطه الاستراتيجيه (مدتها في العاده 5 سنين) ويحولوها لخطة تنفيذيه مدتها بتبقى سنه غالبا لكل هدف بيتحدد مجموعه من ال objectives  وكل واحد منهم بيتحدد ليه مين هايعمله؟ وهايعمله ازاي؟ وبكام؟ وامتى؟ وايه وسيلة تقييمه؟ 

اااه وسيلة تقييمه دي بترجعنا لموضوعنا : المؤشرات 

-------------------------------------------------------------------------------------------------------------

المؤشرات  : زي ما اتفقنا هي وسيلة عشان نعرف احنا رايحين فين وربطها بالخطه الاستراتيجيه بيتم بعدة وسائل منها ال
balanced score card او بطاقة الاداء المتوازن (اسمها بالعربي عجيب اوي !!!!)

طب تكملة لمثالنا ايه هي المؤشرات اللي ممكن تتحط لاسرة الاستاذ برعي عشان يحققوا اهدافهم الاستراتيجيه؟

مثلا : 

نسبة التقدم في تحصيل مواد الدكتوراه للاستاذ برعي طبقا لعدد الصفحات المحدد يوميا 

عدد المشاريع الابداعيه اللي هايقدمها في شغله كل 3 شهور (عشان يترقى)

نسبة المبالغ التي يتم ادخارها فعليا شهريا على اجمالي المبلغ المراد ادخاره

و هكذا ....

ايه خطوات عمل المؤشرات بقا ؟؟؟

4 خطوات متتاليه :

1. تحديد المؤشرات : وده طبقا لنوعها مؤشرات للبنيه التحتيه structure, وللاجراءات process وللنواتج outcome ومنهم بنحدد اهم مؤشرات تخدم اهدافنا الاستراتيجيه
2. تعريف او وصف المؤشر : لو جربت تجيب شخصين وتطلب منهم يعدولك عدد الناس اللي قاعده  في مكان زحمه  خلال وقت معين الاتنين هايطلعوا بنتيجتين مختلفتين لان كل واحد فيهم هايعد بمزاجه ممكن واحد فيهم يفهم "اللي قاعده " دي ان قصدك كل الناس واقفين وجالسين والتاني يفهمها ان قصدك الجالسين بس , وهكذا .... طب ايه الحل عشان تمنع ده ,, انك توصف المؤشر صح يعني تقول للي هايجمع البيانات ايه البسط وايه المقام وهايعد مين ويسيب مين ويسلم البيانات لمين وايه فايدتها وغرضها
3. تجميع البيانات : وهنا بنحط خطه مين هايجمع البيانات وازاي ومنين وامتى
4. تحليل البيانات : وهنا بنحول البيانات لمعلومات تقدر ادراة اسرة الاستاذ برعي تستفيد منها

 وتشوف اذا كانت ماشيه في طريقها ولا استاذ برعي محتاج يسيب البلاي استيشن ويركز في شغله اكتر 

#الجودة_أسلوب_حياة

الجودجي

ادوات الجودة للمديرين الفنيين

ادوات الجودة للمديرين الفنيين 

اهم ادوات الجوده اللي ممكن تحتاجها فرق الكورة :

المديرين الفنيين: 
تحليل القوه والضعف والفرص والتهديدات (swot analysis) 
ادوات تحليل المخاطر الاستباقيه (FMEA failure mode and effect analysis) قبل الماتشات
ادوات البحث عن السبب الجذري بعد الماتشات (Root cause analysis, regression analysis, 5 whys) خصوصا لو اتغلبوا بنتيجه كبيره زي اسبانيا كده  ده بيبقى حدث جسيم
ادوات اتخاذ القرار وتحديد الاولويات (pareto analysis, prioritization matrix,....)
--------------------------------------------------------
مساعد المدرب:
ادوات جمع البيانات وتحليلها (check sheet, run and control charts,graphic display of data)
-----------------------------------------------------
اللعيبه:
زي اي process owner محتاجين
مخطط الاجراءات flow chart
--------------------------------------------------
الحكم:
برضه ادوات اتخاذ القرار
------------------------------------------------
المعلقين :
والنبي بس يركزوا في اسامي اللعيبه 
مثال بقا:
ادوات تحديد المخاطر الاستباقيه زي ال FMEA (Failure mode and effect analysis
ببساطه كل اللي بنعمله اننا بنكون فريق غالبا هايبقى من المدير الفني نفسه و معاه المساعدين وكابتن الفريق 
هايقعدوا مع بعض ويرسموا مخطط فيه تصورهم ازاي الماتش هايمشي خطوة بخطوة ويحطوا الكلام ده في جدول اول خانه فيه هاتبقى الخطوات وبعدين يفكروا ازاي كل خطوه ممكن تفشل (ميسي يتعور مثلا وهو بيرقص) ويحدد لكل خطوه خطورتها و امكانية حدوثها و امكانية اكتشافها ويدي رقم لكل عامل من دول
مثلا : الخطوة ميسي هايرقص من الشمال ويخش جوه الملعب ، الفشل : هايتكسر ، ا
لخطوره (على مقياس من 1 ل 5 ):4
 امكانية حدوث الفشل : 2
 سهولة اكتشافه:2
 يبقى الفشل ده درجة تأثيره ع الماتش كله (4×2×2) = 16
وهكذا لبقية الخطوات ... في الاخر هايبقى عنده كل انواع الفشل اللي ممكن تحصل واهميتها وبعد كده يقدر يحط خطه عشان يتغلب ع اهم انواع الفشل ده قبل ما تحصل اصلا 

‫#‏الجودة_اسلوب_حياه‬
الجودجي